LHDA e Nehelana ka e 'Ngoe ea Thepa ho Sepolesa sa Lesotho
Maseru - 11 Hlakola, 2004
Mookameli e Moholo oa Setsi sa Morero oa Metsi a Lihlaba ( LHDA), Monghali Liphapang Potloane o nehelane ka makoloi a mararo a hulang ka mabili a mane (4x4), lihekana le bolulo ba sepolesa ho Mookameli oa Sepolesa moketjaneng o neng o ts’oaretsoe mapatlelong a ntlo-kholo ea Sepolesa Maseru kajeno.
Ts’ebelisano-mmoho pakeng tsa LHDA le Sepolesa sa Lesotho e qalile ka lilemo tsa bo- 1990 ha ho ahoa lebota la letamo la ha Katse le mesebetsi e meng. LHDA e ile ea kalimana ka makoloi a mabeli a hulang ka mabili a mane, ho Sepolesa sa Leribe le Butha-Buthe ho hlokomela litaba tsa pabaleho ea maphelo a basebetsi ba Mokonteraka, Bahahlauli le baeti ba chakelang Metsing a Lihlaba. Makoli ao a bile a fetisetsoa Sepoleseng ka molao kamor’a pheletso e mokhahlelo oa pele, karolo ea pele (Phase 1A) ea Morero.
Ka selemo sa 2001 ha mosebetsi oa khaho ea letamo la Mohale e qalella, LHDA e ile ea eketsa ts’ehetso ea eona ho Sepolesa sa Lesotho ka ho fana ka makoloi a mararo a mofuta o hulang ka mabili a mane ho lisa ‘mila oa Kofi Annan, le o kopanang le ona o lebisa Ha Mohale (Mountain road) le ‘mila o ka leboea ho naha e eang metsing a lihlaba, o bitsoang Nelson Mandela.
Lits’enyehelo tsa thepa e makoloi, lihekana le bolulo e atamela ho limiilione tse tharo tsa Maluti (3 Million).
Qetello ea Molaetsa ……… 11 Hlakola 2004
Bakeng sa tlhakisetso litabeng tsena le ling tse amanang le Setsi sa Morero oa Metsi a Lihlaba, bona Monghali Tsotang Moeketsi Mookameli oa Liphatlalatso mokatong oa 4 Lesotho Bank Tower, Fono-fono: 22 311 280, Thekeng : 58 857 202